Velkomen om bord på MS Skulebas

Den 25. november legg vårt eige opplæringsfartøy, MS Skulebas, frå kai og reiser på eit to-vekers seglas i Nordfjord og Sunnfjord. I løpet av seglasen skal vi innom åtte hamner, og i kvar hamn ynskjer vi å invitere både elevar, føresette og innbyggjarane elles velkomen om bord på Ope skip. Her møter besøkande både elevar og lærarar som vil gi omvising på det flotte skipet vårt, samt dele informasjon om skulen sitt mangfaldige tilbod.  

Størsteparten av mannskapet om bord er elevar på Vg1 Teknologi- og industrifag. For fyrste gong skal Vg1-elevane ha delar av den praktiske opplæringa si om bord på Skulebas. Dei to klassene på skulen har kvar si veke på seglas, der målet er at dei på ekte vis skal få erfaring med livet på sjøen og få djupare innsikt i yrker innan maritime fag. Samstundes vil elevane kunne dele av sine kunnskapar og erfaringar. Dei vil fortelje om korleis skulekvardagen er, kva moglegheiter dei har for vidare utdanning og yrkesliv, og ikkje minst korleis det er å vere elev ved Måløy vidaregåande skule.

På dagtid vil vi ynskje 10. klasse og elevar på vidaregåande skule velkomen om bord, og på kveldstid held vi opent for alle som måtte ynskje det. 

Vi set stor pris på om de vil dele denne informasjonen med innbyggjarane dykkar. 

Vedlagt finn de ei bilde-fil som kan delast i sosiale media-kanalar saman med lenka til saken på heimesida vår https://www.maloy.vgs.no/om-skulen/skulen-var/seglas-med-ms-skulebas/. I denne lenka finn de også besøkstider for Ope skip i dykkar hamn. 

Hjarteleg velkomne skal de vere!