Kafe og bronsealder 6. oktober

Søndag 6. oktober, kl. 16.00, er det kafé i Botnane grendahus. Der får vi besøkt av professor Nils Anfinset, frå Universitetet i Bergen. Han har nyleg gjeve ut ei bok om bronsealderen og vi har bedt han kome for - om mogeleg - å gje oss eit inntrykk av korleis det var her då. 

Hannele Turunen og Marion Van Eck Ederveen har teke på seg å stå for maten på kafeen. 

Nils Anfinset kontakta Botnane og Årebrot grendalag i fjor, med spørsmål om han kunne bruke bilete frå sida om gravrøysene på www.Botnane.no Det fekk han løyve til, med lovnad om å kome og fortelje om bronsealderen på ein søndagskafe. Dei fire store gravrøysene i Botnane er frå den tidsepoken, og det var på grunn av dei at det i 2021 vart skilta ei Kulturminneløype om dei vel 40 gravrøysene Botnane-Årebrot. 

Anfinset er professor i arkeologi ved Universitetet i Bergen og arbeider i avdelinga for kulturhistorie ved Universitetsmuseet. Håpar mange har interesse av å lære meir om bakgrunnen for gravrøysene våre, og at historieinteresserte frå omlandet vårt også tek turen til Botnane denne søndagen. For gravrøyser finst det mange av elles også i området vårt. Kjekt om folk kan dele dette, slik at vi når ut til fleire.